ТАРИХИ-МӘДЕНИ МҰРАНЫ НАСИХАТТАУДАҒЫ МУЗЕЙДЕ ҰЙЫМДАСТЫРЫЛАТЫН ҮЙІРМЕ ЖҰМЫСТАРЫ: «ӘЗІРЕТ СҰЛТАН» МУЗЕЙ- ҚОРЫҒЫНЫҢ ТӘЖІРИБЕСІНДЕ

Аннотация

Аңдатпа. Мақалада музейлердегі үйірме жұмыстарын ұйымдастырудың тарихи-мәдени мұраларды насихаттаудағы маңызы қарастырылады. «Әзірет Сұлтан» Ұлттық тарихи-мәдени музей-қорығында 2024 жылдың қазан айынан 2025 жылдың ақпан айы аралығында мектеп оқушыларына арналған үйірме жұмыстарының ұйымдастырылуы зерттеледі. Мақалада музей педагогикасының әдіс-тәсілдері арқылы оқушыларды тарту, қосымша білім беру бағдарламаларының тиімділігі және музей-қорықтағы қысқа мерзімді үйірме сабақтарының ерекшеліктері талданады. Зерттеу нәтижелері музейлердің білім беру және мәдениет саласындағы рөлін арттыруға, тарихи-мәдени мұраны насихаттауға бағытталған жаңа тәсілдерді дамытуға ықпал етеді.

Зерттеу нысаны ретінде «Әзірет Сұлтан» Ұлттық тарихи-мәдени музей-қорығында оқушыларға арналып ұйымдастырылған үйірме жұмыстары алынды. Үйірме сабақтары негізінен мектеп оқушылары арасында жас ерекшелігіне қарай: 7-8 сынып оқушылары; 9-10 сынып оқушылары болып 2 топқа бөлініп ұйымдастырылды. Алдын-ала бекітілген тақырыптық жоспар негізінде жүйелі түрде оқытылатын үйірме сабақтары теориялық және практикалық бөліктерден тұрады. Онда «Әзірет Сұлтан» Ұлттық тарихи-мәдени музей-қорығына қарасты археологиялық ескерткіш нысандарының тарихы, өткені мен бүгіні туралы, Түркістан тарихына қатысты ақпараттар, өлкедегі өзге де ескерткіштер туралы оқыту қарастырылған. Оқытылатын сабақтар жекелеген топтарға бөлініп, әр топта 8-10 оқушыға дейін болады. Үйірме оқушылардың сабақтан тыс бос уақыттарында ұйымдастырылып, 2024 жылы мектеп оқушылары арасынан «Жас археолог», «Жас реставратор» үйірмелеріне алғашқы қабылдау болды.