МУЗЕЙ ПЕДАГОГИКАСЫ: ҚҰРЫЛЫМДЫҚ БӨЛІМНЕН ҒЫЛЫМИ ПӘНГЕ ДЕЙІН

Аннотация

Аңдатпа. Қазіргі уақытта музей педагогикасы музей саласының маңызды құрылымы болып табылады. Себебі сол арқылы музейдің құрылымдық тетіктері экспозиция мен экскурсия көпшілікке танылады. Музей педагогикасы – музейтану, педагогика және психология салаларының үштігін құрайды.

ХІХ-ХХ ғғ. Еуропа және АҚШ-тың көркем өнер музейлерінде құрылымдық бөлім ретінде бастау алып, аз уақыт ішінде ғылыми пән дережесіне жетті. Халықаралық тәжірибеде музей педагогикасына арналған жүйелі зерттеулер жүргізіліп, оны дамытушы орталықтар қалыптасты. Нәтижесінде музей педагогикасы қор, экспозиция және экскурсия сынды музейдің өзіндік ажырамас бөлшегіне айналды.

Жалпы музей педагогикасының тұжырымдамасы Қазақстан музейлеріне Кеңестік кезеңде еңгізіле бастады. Қазіргі уақытта отандық музейлер өз жұмысының білім беру бағытын педагогикалық және мәдени-ағартушылық шаралар түрінде жүзеге асырып келеді.

Мақалада музей педагогикасының қалыптасу үдерісіне шолу жасау арқылы қазақстанның музей педагогикасының өзекті мәселелерін айшықтау көзделеді. Қазақстандағы музей педагогикасының қарқынын саралау назарға алынады. Оқу және тәрбие ісі музейде тұрақты түрде жүргізілетін жұмыс түрінің бірі болып табылады. Осы тұрғыда, музей педагогикасының қалыптасу кезеңін зерделеу негізінде халықаралық тәжірибені анализдеу өзекті болып табылады.